Fiskvinnslu- og útgerðarfélagið okkar Stakkavík ehf. var stofnað í Grindavík árið 1988 af feðgunum Hermanni Ólafssyni, Gesti Ólafssyni, Ólafi Gamalíelssyni ásamt Benedikt Jónssyni tengdaföður Hermanns.

Fyrstu árin framleiddum við nær eingöngu í salt og sérhæfðum okkur í vinnslu á stórum fiski enda allt handflatt og flakað þar sem engar voru vélarnar. Árið 1995 keyptum við svo okkar fyrsta bát, sem var 4 tonna handfærabátur sem nefndist Skáley.

Í dag er Stakkavík nútímalegt fyrirtæki með allan nýjasta útbúnað bæði til sjós og lands. Við sérhæfum okkur nær eingöngu í ferskum fiski til útflutnings, aðallega flökum, ýmist með eða án roðs, eða hausuðum fiski. 

Í gegnum árin höfum við myndað viðskiptasambönd í Bandaríkjunum, Englandi, Belgíu, og Þýskalandi og rekum 100 störf til sjós og lands.